Arrosadiako EHEren bloga

Sanfermin euskaldunak

arrosadiaehe — Sat, 02 Jul 2011 11:26:25 +0000

Aurten ere Depor taberna izanen da euskaldunon topagune. Arratsalde eta gauez giro euskaldunarekin gozatzeko parada izanen da uztailaren 6tik aitzina. Gainera, aurten, uztailaren 10, 11, 12 eta 13an kontzertuak eta bestelako ekimenak prestatu dituzte. Gora sanfermin euskaldunak!!

Sarean da AEren 2. alea

arrosadiaehe — Tue, 08 Feb 2011 11:27:57 +0000

Otsaileko Arrosadian Euskaraz irakurgai duzue jadanik. Aldizkari digitalaren bigarren alea atzo igo genuen sarera, aurreikusi genuen bezala. Formatua aldatu dugu, txukunago delakoan, baina lanean jarraituko dugu Arrosadian Euskaraz hobetuz joan dadin. Gainera bigarren ale honek berritasun bat dakar: zenbat buru atala. AE karrikaratzen den orotan auzoko lau pertsonek haien aburua labur-labur emanen dute paratzen zaien gaiaren inguruan.

Aurkezpena
Joan zen larunbatean egin genuen AEren aurkezpena auzoko Zabaldi elkartean. Bertan izan ziren auzoko euskaltzaleek lehen eskutik jakin zuten zein diren AEren nondik norakoak, alegia nola sortu zen eta zertarako. Arrosadian Euskaraz blog honetan eta facebook taldean aurkituko duzue.

Otsailaren 12an Arrosadia ere Donostira, sasi guzien gainetik!

arrosadiaehe — Wed, 02 Feb 2011 09:37:32 +0000

Joan zen larunbatean Arrosadiako euskaltzaleek gure atxikipena adierazi genion EHEk otsailaren 12an Donostian deitu duen manifestazioari. ‘Sasi guzien gainetik, euskaldun eta burujabe’ lemapean, Gipuzkoako hiriburua euskararen aldeko aldarri ozen bihurtu nahi du talde euskaltzaleak. Boulebardetik abiatuko da martxa eta bertan izanen gara ere Arrosadiako euskaltzaleak.
Mobilizazioaz gain, EHEk manifestua karrikaratu du eta atxikipen eske dabil herriz-herri eta auzorik-auzo. Agiri honetan euskaldunon eta Euskal Herriaren burujabetza aldarrikatzen da euskara garatu eta dagokion lekua izan dezan. Ofizialtasunaren bidean, legedi bakarra Euskal Herri independentearekin lortuko dugu. Dena-den, norbanakook ere badugu zer esan handia, euskaraz bizitzeko hautua gure egin behar baitugu.

Eskerrak
Bideoan Arrosadiako Kultur Koordinadorak, EHEk, AEKk, San Fermin peñako konpartsak, Independantza taldeak, Zabaldi KKEko kideek eta auzolagunek parte-hartu zuten. Haiei guziei esker mila aunitz!
Bideoan erabilitako musika Kendra Springerren ‘Angela’ da, Hope albumetik hartua. Artista honen lanak CC lizentzia dute eta Jamendon dira eskuragarri.

Ezabaketa Asteari hasiera eman dio EHEk

arrosadiaehe — Sat, 20 Nov 2010 16:19:21 +0000

Euskal Herrian Euskarazek hasiera eman dio aurtengo Ezabaketa Asteari Iruñean eta Donostian egindako ekimenekin. Iruñean kalejira abiatu da 12:00etan eta UPNren egoitza parean elkarretaratzea egin dute 12:30etan. Bidean ezabaketak egin eta euskararen ofizialtasuna aldarrikatu dute. Donostian ere kalejira egin dute 12:00etan Bulebarretik eta PSE-EEren egoitzan akitu dute. Karrikan kartelak eta pegatinak itsasteagatik, ekimena gertutik jarraitu duten poliziek ez dutela eragozpen handirik jarri esan du EHEk. Hala ere, esku-orrien banaketa saihesteko 500€ko isunarekin mehatxatu dituzte euskaltzaleak. Alberto Catalan zein Isabel Celaáren mozorroak ere ikusi dira Iruñean eta Donostian hurrenez hurren, haien politika kritikatzeko parodia eginez.
Aurtengo Ezabaketa Asteak hezkuntza euskaldunaren aldeko aldarria izanen du ardatz. “Hizkuntza zapalkuntzaren aurrean, ESKOLA EUSKALDUNA!” lemapean, azaroaren 20tik 27ra bitartean hainbat ezabaketa, mobilizazio eta kalejira izanen dira Euskal Herri osoan zehar.

Euskaraz Bai eguna ospatuko da Arrosadian

arrosadiaehe — Fri, 05 Nov 2010 12:40:27 +0000

Euskaraz BAI esanen dugu beste behin ere Arrosadiako auzokideok bihar. Euskaraz Bai Egunak egitarau oparoa dakar bizilagunen gozagarri:

11:00etan olinpiada txikiak eta hamaiketakoa plaza berrian
14:00etan pintxo lehiaketa zabaldin
16:00etan solaskilo jokoa zabaldin (EHEren joko berria)
17:00etan Popi eta Zaratrako pailazoak Albeniz karrikan
19:00etan kalejira Independantza taldearekin. Peñatik abiatuko da.
20:30etan zezensuzkoa plaza berrian
22:00etan KARAOKE-AFARIA peñan (txartelak Peñan eta Euskaltegian dira salgai. 12€ langabetu eta ikasleek; 15€ langileek)
Afalondoan GAUPASA Oskia DJ-arekin.

Euskal Afaria

arrosadiaehe — Sun, 23 May 2010 16:38:51 +0000

Arrosadiako bestak bertan ditugu eta aurten ere euskaltzale orok galdu ezineko afaria izanen dugu. Ekainaren 4an izanen da, ostiralarekin, eta bertan euskaltzale andana bildu nahi ditugu giro euskaldunean bapo afaldu eta kantuan ibiltzeko. 22:00ak aldera bilduko gara Galle plazan.

Txartelak lortzeko jo Arrosadiako Euskaltegira edo Albeniz tabernara. Langabetua bazara 12€ eta langilea izanez gero 15€ balio du.

MENUA:
Patea
Risotto
Albondigak
Postrea, kafea eta kopa

ANIMA HADI! HATOR GUREKIN AFALTZERA!

HERRI EUSKALDUNA JOMUGAN

arrosadiaehe — Mon, 26 Apr 2010 15:51:21 +0000

HERRI EUSKALDUNA JOMUGAN.

Unai Larreategi eta Igone Lamarain EHEko kideak.

Orain aste batzuk Joxe Manuel Odriozolak ondorengo amaiera zeukan artikulua argitaratu zuen: “Hona, bada, paradoxa: euskara etnikoa euskara abertzalea baino eraginkorrago ageri zaigu euskaldunen herri-erreferentziak partekatzeko zereginean. Hala ere, abertzaletasunak, hitzak hitz, egitez, muzin egiten dio euskarazko nazio kulturala lehenesteari nazio politikoarekiko harremanetan. Bien bitartean, euskal estatua gora eta euskal estatua behera gabiltza. Gurea ez ote da patetiko samarra?“ Ideia interesgarri hauei tiraka zenbait hausnarketa plazaratu nahiko genituzke geuk ere; areago gainera, Baigorrin ospatzen den Nafarroaren Egunaren karietara.

Euskal Estatuaz gora eta behera ibiltzea gauza ederra litzateke estatu hori ze helbururekin lortu nahi dugun ondo definituta edukiko bagenu. Gauza ederra litzatekeela diogu, seguru aski euskal estatua lortu arteko bidean indarra non egin argiago erakutsiko ligukeelako. Ikerketa soziologikoek Euskal Herrian % 30 inguru independentistak garela diote. Baina zer erantzungo genuke ondoko galdera egingo baligukete? “Eta zertarako nahi duzu independentzia?” Hobeto bizitzeko, selekzio propioak izateko… erantzun nahiko errepikatuak izango lirateke. “Ez daki / ez du erantzun” ere sarri samar aipatutako erantzuna izango litzateke. Bakarren batek esparru sozioekonomikoa geuk eraikitzeko erantzungo luke… baina zenbatek erantzungo lukete “herri nortasuna mantendu eta garatzeko, berreuskalduntze prozesua azkartzeko behar dugu euskal estatua” bezalako esaldiren batekin? Egin proba zuen inguruan eta konprobatu emaitzak.

Gure ustez azken honek beharko luke euskaldun eta abertzale guztien oinarrizko erantzuna. Baina zergatik ez da horrela? Etnozidioan, hizkuntza ordezkapenean oinarritutako zapalkuntza jasaten ari den herria geroz eta asimilatuagoa den seinale izango da, beharbada? Aberri Egunaren testuinguruan argitara emandako idatzian esaten genuen bezala, aipatu asimilazio prozesuari aurre egiteko izan behar dugu burujabe; hizkuntz ordezkapenean oinarria duen asimilazio prozesuari aurre eginez soilik egin dezakegu euskaraz biziko den Euskal Estaturako bidea, eta egiten gabiltza. Halere, joko-zelaiaren bestaldekoek ere bidea egiten dihardute.

Zapaltzaileek bidea egiten dihardutela onartuta, zein da euskaltzale eta abertzaleok egiten ari garen bidea? Herriaren askapen prozesuan dihardugula esango dugu gehienok. Baina nola ulertzen dugu askapen prozesu hori? Herri euskalduna eraikitzeari lotuta edota Euskal Herria lur-eremua askatzeari lotuta? Aberri Egunari begira esan bezala diogu gaurkoan ere, Herri euskalduna dela eta izango dela gure lurraldea, euskaraz bizi den, euskaraz biziko den herria, euskal hiztunok egingo dugun aberria.

Euskal Herrian Euskaraz-ek argi esan izan du bere sorreratik, bi bideak uztartzea ezinbestekoa dela euskaraz biziko den herria berreraiki ahal izateko. Orokorrean, ordea, lur-eremuaren askatzeak askoz garrantzia handiagoa izan du. Herri euskaldunaren eraikuntza bigarren maila batean kokatu izan da. Are okerrago, lehenengoa lortze bidean zapaltzailearen hizkuntza erabiltzea ere oso ohiko bihurtu da (horregatik hitz egiten dugu “euskararen auziaz”, eta ez euskaraz bizi ezin den herri “euskaldunaren problemaz”). Nazio arazoaren osagarri nagusi gisa euskara kokatzeko sortu zen EHE orain 30 urte, baina argi dago Euskal Herriaren askatze prozesua termino horietan kokatzetik urruti dagoela oraindik.

Euskal nazioa osatzen dugu, eta Euskal Herria berreraikitzean herri egiten gaituenari lehentasuna ematea ezinbestekoa izango da gure herri izaera ez galtzeko. Horregatik, orain 30 urte bezala, aurrerantzean ere nazio honen eraikuntza eta herri honen askatze prozesuan euskara eta herri euskalduna erdigunean kokatzeko ahaleginetan jarraituko dugu guk. Baita herri euskaldunaren berreraikuntzan urratsak ematen eta eragiten ere.

Urruti egonagatik ordea ez dugu bide horretan etsiko. Euskarazko nazio eraikuntza da gure iritziz asimilazio prozesuari, nazio zapalkuntzari aurre egiteko biderik egokiena. Horregatik egin dugu aurten Hizkuntza Eskubideen Eguna antolatzetik Euskaraz Bizi Eguna antolatzera salto. Dagozkigun eskubideen urraketak salatzeari eta aldarrikatzeari uko egin gabe, gure nortasunaren zutabe nagusi den hizkuntzari eta euskaraz bizitzeari zentralitatea emateko garaien aurrean gaudelako gure iritziz. Norbanako zein herri moduan hartu beharreko hautua izango da beraz, Maiatzaren 2an Etxarrin ospatuko dugun Euskaraz Bizi Egunaren ardatz nagusia. Apustu garrantzitsua dugu euskaltzale eta abertzaleok aurrera begira, zapalkuntza gaindituta aske eta euskaraz biziko den herri euskaldunari begira: Autodeterminazio ariketa gisa, gaurdanik eta norbere burutik hasita, euskaraz bizitzearen aldeko hautua errealitate bihurtzea.

Euskaratik eta euskaraz herria sortzen zabiltzaten guztiok gonbidatuta zaudete bertara. Bizi euskaraz!

EUSKARAZ BIZI EGUNA!! MAIATZAK 2, DENOK ETXARRI-ARANATZERA

arrosadiaehe — Mon, 12 Apr 2010 16:07:24 +0000

Aurreko urteetan Lesaka, Oiartzun, Santurtzi, Azpeitia, Atarrabia eta Ondarroan egin den Hizkuntza Eskubideen Egunak bere ibilbideari amaiera eman eta berriz ere milaka euskaltzale batu eta jaia eta aldarrikapena uztartuko dituen EUSKARAZ BIZI EGUNA delakoari irekiko dizkio ateak, heldu den maiatzaren 2an Etxarri-Aranatzen. Iruñeko Foruen Monumentuan egin du aurkezpena EHEk

EHEk 30 urte bete berri ditu, eta heldu den maiatzeko Euskaraz Bizi Egunak atzera begirakoa egiteaz gain, etorkizunera begira eragile euskaltzaleak egiten dituen planteamentuetarako mugarri izan du, norbanakoongandik hasita eta komunitateari begira, euskaraz bizitzearen aldeko hautua indartu eta herri euskaldunaren bidean urrats berriak egiteko borondatearekin.

‘Euskal Herrian Euskaraz bizi! Euskal Herri euskalduna eraiki!’

Maiatzak 2, Euskaraz Bizi Eguna Etxarri-Aranatzen

Ikasturte honetan zehar hamaika aldiz errepikatu dugu EHEren 30. urteurrena izaki, urte garrantzitsua dela aurtengoa eragile euskaltzalea osatzen dugunontzat. Aurreko urteetan bezala, aurten ere, euskaldunon hizkuntza eskubideen zapalkuntzari aurre egiteko eta Euskal Herri euskalduna eraikitzeko hainbat dinamika jarri ditugu abian. Halaz ere, 30 urte luzeko borroka euskaltzalea sorbaldan daramagula kontutan hartuta, arnasberriturik berrekin nahi diogu euskaraz biziko den herriaren bideari, arestian aipatu dinamikei hauspo eta bultzada berri bat emateko asmo biziarekin. Hiru hamarkada hauetan egindako bidea luzea bezain gogorra izan da, beren une latz, eder eta gogoangarriekin, baina gaurkoan, aurrerantz begiratzeko bildu gara atzoko, gaurko eta biharko EHEko 11 kide, herria berreuskalduntzeko bidean planteatzen ditugun urratsak jendarteratzeko borondate zintzoarekin.

Hala, albiste txar bat eman ostean, albiste on bat ematera gatoz. 2004az geroztik EHEk antolatu Hizkuntza Eskubideen Egunak bere ibilbidea bukatu duela esan beharra dugu, halaxe baita. 2004an ospatu genuen lehen aldiz Lesakan, Hizkuntza Eskubideen lehen Eguna. Haren atzetik etorri ziren Oiartzun, Santurtzi, Azpeitia, Atarrabia eta Ondarroakoak. Jaia eta borroka uztartzen zituzten egun horien bidez, euskaraz bizi den herria irudikatu eta herri euskaldunaren aurkako jazarpenari aurre egin nahi izan genion han eta hemen. Hainbat eta hainbat izan dira milaka euskaltzale batu dituzten ekimen horien joanean jasotako ikasgai eta bizitako esperientziak, eta golkoan gordeko ditugu, EHEren ibilbide oparoan mugarri ezberdin gisa kokatuz. Hizkuntza Eskubideen Eguna joan zaigu, bada.

Joan egin zaigula diogu, baina ez da alferrik izan; izan ere, eta agerraldi honen bidez, lehenengo Euskaraz Bizi Eguna delakoari ongi etorria eman eta Euskal Herriko euskaltzaleen aurrean aurkeztu nahi baitugu jaia eta borroka uztartzen zituen egunari segida emango dion egitasmo sortu berria.

Hala, heldu den maiatzaren 2an lehen Euskaraz Bizi Eguna ospatuko dugu Etxarri-Aranatzen. Urrats berria egin du EHEk planteamentu honekin, baina zergatik biziko dugu aurrerantzean Euskaraz Bizi Eguna? Bada, Herri Euskalduna delako berreraiki nahi dugun herria, eta zentzu horretan ezinbestekoa delako eta izango delako euskal hiztunoi, norbanako zein kolektibitate, dagozkigun eskubideak aldarrikatzetik harago euskaraz bizitzearen aldeko hautu indartsua egin eta euskaraz biziz Euskal Herri euskaldunerako bidea egiten joatea.

Badakigu bide hori ez dela erraza izango, eta urratsez urrats joan beharko dugula helmugara heltzeko beharrezkoak diren erroko aldaketak behartzen. Jendartea euskaraz bizi dadin nahitaezkoa izango da norbanakoengandik hasita euskarari esparru eta maila sozial, juridiko eta administratibo guztietan lehentasuna ematea. Gutariko bakoitzak zein euskal komunitateak euskarari lehentasuna emanez, euskaraz biziz, herri euskalduna indartzeko urratsak emateaz gain aldaketak bultzatuko ditu, eta maiatzaren 2ko Euskaraz Bizi Egunak hautu horretara hurbildu nahi ditu euskaltzale guztiak.

EHEtik planteatzen dugun egitasmo berri hau ez da mugatuko egun bakarreko dinamikara, eta Euskaraz Bizi Egunarekin batera, hainbat eta hainbat izango dira Euskal Herriko luze eta zabalean emango diren bestelako ekimenak. Hainbat herri eta auzotan Euskaraz Bizi Egun herrikoiak antolatuko ditugu; horrekin batera, zonalde jakinetako euskalgintzarekin hamarnaka bilkura bultzatuko ditugu tokiko errealitateari erreparatu eta euskaraz bizitzearen aldeko dinamikarako atxikimendua bilatzeaz gain problematika propioei elkarlanaren bidez erantzun amankomunak bilatzeko xedearekin; hainbat aurkezpen, deialdi eta mobilizazioren bidez herri euskaldunaren aldekoak aktibatzeko dinamikak sustatuko ditugu. Horiek, gaurdaino EHEk eraman duen borrokaren baitan ohikoak eta iraunkorrak diren beste ekimen guztiekin uztartuko ditugu, euskaraz bizi ahal izateko Euskal Herri osorako ofizialtasuna galdeginez, kanpo esku-hartzerik gabeko hizkuntza politika burujabeak sortu eta garatzeko eskubidea aldarrikatuz, hizkuntza eskubideen bermea exijitu eta horien urraketak salatuz eta herri euskaldunaren aurkako eraso oro arbuiatuz, datorren lekutik datorrela.

Maiatzaren 2an euskaltzaleok Etxarri-Aranatzera!

Aipatu borondate guzti horiek egikaritzera dator Etxarri-Aranatzen lehen harria jarriko duen eta ‘Euskal Herrian Euskaraz bizi!!! Euskal Herri euskalduna eraiki!’ leloarekin jantziko den Euskaraz Bizi Eguna. Jai eta borroka egun honen bitartez, euskaraz bizi den eta maila guztietan bizi nahi duen herri bat badela irudikatu nahi dugu. Horregatik aukeratu ditugu Etxarri-Aranatz eta Sakanako eskualdea, euskaraz bizitzeko grina duen zonalde euskalduna delako, eta etorkizuneko herri euskaldunaren erakusleiho izatea nahi dugulako.

Guztion artean eta auzolanaren bidez berreuskaldundu nahi dugu herria, eraiki nahi dugu herri euskalduna, eta Euskaraz Bizi Eguneko egitarau oparoan auzolan horrek isla izan dezan egin dugu ahalegina. Zentzu horretan, Etxarri-Aranatzeko eta Sakanako euskaraz bizi diren hainbat elkarte eta herri eragilerekin batera egin dugu lana. Bertako norbanakoekin eta kolektiboekin egindako lanaren ondorio da beraz Euskara Bizi Eguneko egitaraua:

Goizeko 10,00etan hasiko dugu eguna dianarekin, hots, txupinazoa eta trikitilarien kalejirarekin. Ondoren, eguna indartsu abiatzeko “auzatea” eskeiniko digute herriko elkarteek plazan, eta sabela eta eztarria alaitzeko aukera izango dugu. Eguerdira bitartean kale animazioa eta herri kirolen erakustaldia egongo da, bertakoen eskutik, eta horrekin batera bizi ahal izango ditugu azokaren baitan jasoko direnak; hala nola, artisauen eta herri mugimenduen erakusketak, graffitia, gaztetxekoen serigrafia tailerra, edota beste tailerren artean azpimarratzekoa izango den ‘Nola bizi euskaraz?’ tailerra. Izan ere, erraz esaten da euskaraz bizi behar dugula, baina norbanakook ez ditugu beti eskura hori hala izateko tresnak eta estrategiak, eta tailer honen bidez hasi nahi dugu norbanakoek lanabes horiek eskura izateko saiakera.

Eguerdiko ordubatean emango diogu hasiera aldarrikapenari eta Euskaraz Bizi Eguneko ekimen azpimarragarrienei, ‘Euskal Herrian Euskaraz Bizi!!! Euskal Herri euskalduna eraiki!’ lelopean abiatuko den manifestazioa eta horren osteko ekitaldi nagusiarekin. Ekitaldi berezia izango da nolanahi ere, EHEren 30. urteurrena dela kontutan hartuta, iragana eta etorkizuna batuko dituen ekitaldia prestatu baitugu.

Gure aldarrikapenei oihartzuna eman eta aurrera begirako mugarriak ezarri ostean 500 pertsonentzako herri bazkariak eta ondorengo kantaldiak jarraituko du jaia, guztia tokiko elkarteek antolatuta. Adi hortaz euskaltzaleak eta joan zuen herrietako EHEko kideengana eta ohiko lekuetara bazkarirako txartel bila, merezi du eta.

Bazkalostean haurrentzako jolasak eta Pantxika eta Txinparta pailazoen jardun alaiaz gozatzeko aukera izango dute txikienek, eta ez hain txikiek, eta 17,30etan aldiz, dantzarako gogoa duenak gorputza astintzeko aukera paregabea izango du AIKO taldearen erromerian. Bestelako soinuak nahiago dituenak ere kontzertuak izango ditu gaztetxean, EGURRE eta Sakanako beste talde baten eskutik.

Nahi duenak jarraitu dezala jaia, baina gure egitaraua hortxe bukatzen da.

EUSKAL HERRIAN EUSKARAZ BIZI!!! EUSKAL HERRI EUSKALDUNA ERAIKI!

EUSKAL HERRIAN EUSKARAZ

2010eko apirilaren 10ean

Inposaketarik ez!

arrosadiaehe — Wed, 10 Mar 2010 15:29:46 +0000

Mobilizazio eguna izanen da hilaren 13a. Euskal Herriak Bere Eskola herri ekimenak manifestazioa deitu du Bilbon “Inposaketarik ez! Euskal Herriak bere hezkuntza!” lemapean.

Ekitaldia eta manifestazioa aldi berean eginen dira, formatu berri batean: Arriagan hasiko da arratsaldeko 17:30tan eta bertan bukatuko da, Plaza Biribila eta Udaletxetik pasa ondoren. Kulturak, aldarrikapenek eta koloreak lekua izanen dute eta “inposaketarik EZ!” esatetik “Euskal Herriak bere hezkuntza” esatera igaroko gara ibilbide sinboliko horretan.

[issuu layout=http%3A%2F%2Fskin.issuu.com%2Fv%2Fcolor%2Flayout.xml backgroundcolor=A4112B showflipbtn=true autoflip=true autofliptime=6000 documentid=100221212922-d1655161412f4d59ba3eb2465070f1b4 docname=hezkuntzadeialdia username=euskaleskola loadinginfotext=Hezkuntza%20Deialdia width=300 height=112 unit=px]

Kamiseta berriak

arrosadiaehe — Wed, 24 Feb 2010 12:28:56 +0000

“>

Zure kamiseta eskuratzeko bidalizkiguzu zure datuak helbide honetara:

arrosadia@euskalherrianeuskaraz.org